الاستاذ سمير
راجل من العصر الذهبى
وله فى حب المرأه معايير
لازم تكون واحده حلوه
ويكون الخير كتير
وكانت من نصيبه
ليلى واتجوزها سمير
وجت ليلة العمر
ووصلوا للسرير
قالت يا سمير الصبر
هو انا هاطير
قالها من النهارده
لازم يبقى اسمى
السيد مسامير
قالتله ليه هو انا لوح
هتلزقه بالاميـــر
ولا انا ماعنديش احساس
خلاص مافيش تقدير
قالها هو ده شرطى
وممنوع خروج من البيت
لانى رجل شرقى بغيــــر
ردت عليه ليلى وقالت
عصر التحكم ف المراه
والتحكمات دى انزالت
وعصر سى السيد بح
وخلاص امينه مراته ماتت
وخلاص ليلى اتحضرت واتعلمت
ومن جهل التخلف فاقت
اه ليك حق تحكمنى
فى حدود دينى ورضا ربى
بس مش تهينى وتسجنى
وتقولى لازم تنفذى امرى
رد سمير وقالها كلامك صحيح
انا عمرى مافكرت اهينك
ولا اقصد التجريح
وهابقى معاكى حصن ودرع
وطبعى هيبقى مريح
بس لازم تعرفى انك سيت
وانا راجل
ومهما كنتى او اتعلمتى
خروجك عن طوعى وتكسير اوامرى
شئ باطل
واتفقوا ليلى وسمير
وحطوا لحياتهم معايير
وعاشوا حياتهم ف سعاده
والحب بقى بينهم بزياده
وهنيالك يا سميــــــــــــر
posted by مفلس افندى الرايق @ 6:27 AM
55 Comments
55 Comments:
بناء على طلب معظم حزب ليلى وتضامننا للاخ الزعلان قوى علشان نهدى النفوس
انت بتهدى النفوس ولا جاى كلمة حق تقول زمن التحضر ابتدىوليلى اخدت حقها من عادات كانت زايده حزنها
وبدأت تاخد وضعها ولسه حافظه تعاليم دينها فى طاعة امر جوزها فى حدود مراعيه لربه
ولا يظلمها ولا تظلمه
انا عاوز يبقى الكل فاهم لو طبقنا حدود ربنا كله هياخد حقه هو تاعبنا الا البعد عن تطبيق تعاليم ربنا خصوصا ف حقوق الازواج
بس ايه رايك فى سمير ههههههه؟
هههههه
سمير بعد ما قال مفيش اهانه ولا تجريح
رجع فى كلمته بكلام صريح
انتى الست وانا الراجل
يعن هوهو الكلام معداش عليه ثوانى
هههههههههههه
ربنا قال ( الرجال قوامون على النساء) بس شكل معظم الناس فاهمه القوامه غلط
وسمير منهم يامفلس
احنا ده اللي بنقوله حقك وحقي ومن غير اهانات عشان كده انت جبت الخلاصة وتحية لسمير
moorgen
ده سمير اما انا غير سمير خالص انا سامح او ساهر انا حونين هههههههه
LAMIA MAHMOUD
شوفتى يا لمياء صدقينى مش كل الرجاله سي السيد
على العموم لازم ندى كل واحد حقه
تحبى اغير اسمى وابقى سي سمير ؟؟؟ هههههههه
اشطه عليك يامان,,,ـ
هوه ده كلام الناس العقلين
مش كلام ليلي اللي يسقط الجنين
ان كان فيه مشاركه يبقي لازم فيه موازين
و ولا تظلميني ياليلي و ولا توظلمين
هي دي المشاركه اللي لازم تكون بين كل اتنين
تحياتشي
BackBone
بجد كلمتين منك حلوين
ويا ريت يا ليلى تفهمين
احنا مش ظالمين
ولا احنا وحشين
احنا بس عاوزين
نعدل الموازين
فاهمين ولا مو فاهمين؟؟؟
على فكره كلامك عاجبنى بجد وفرصه سعيده بوجودك
حلوة قوي
وبرضه حا اقولك يا لذيذ يارايق
حكم والله حكم
يا مفلس
صح كلامك
كده مش هيبقي فيه مشاكل عويصه
ماهو كان ماشي كويس وطيب، قلب لية
تكسير اوامري وليلي فرحانة اوي؟
حقيقي الملافظ سعد يا عبعال !! مايقوللها خوفا عليها ولا حماية ولا اي حاجة تغطي الكلمتين دول
MAKSOFA
لو فعلا هى حلوه قوى
الاجمل وجودك عندى
معاكى ربع جنيع سلف ياختى
اشترى بيه صودا اصل اتسربت صودتى
مع تحيات
7up
sara
شوفتى يا ساره
مفلس طيب ازاى
هاجيبلك ف عيد الحب خياره
وهاعملك بيبسى على شاى
شوفتى الرجاله شاطرين ازاااااى
saso
انت فين يا بنتى من ساعة ما جهزت لبس الكشف والعده بتاعت القطط وانتى اختفيتى
:)
ايه ده يا سمير
مابلاش كلام كتير
و الزق الافعال بأميير
ههههههه
الاهم الفعل مش الكلام
مسا الفل
:)
Epitaph
حاضر هالزقها بامير
وهربطها فى رجل السرير
وهازغزغها من رجليها
اصلها من رجليها بتغييير
نورت المدونه بجد
لاء مفيش مشاكل سيب الاسم زي ما هو المهم اللي جوه
;)
و هكذا عاش سمير و ليلى في سعادة وسكر نبات
و خلفوا صبيان و بنات
و التعلب فات فات
الفكرة حلوة
بس خيالية
الي حد ما
حعدي تاني
تحياتي
LAMIA MAHMOUD
نسيب الاسم زى ما هو
وزى ما قولتى المهم اللى جوه
المهم الطبع والاخلاق
والحب الصادق والاشتياق
المهم الجيب يبقى مليان
فهمان ولا مو فهمان
يا سمير سرحان
ازيك يا لمياء؟
كلبوزة لكن سمباتيك
يعجبنى فيكى نظافة دماغك
ماهو سمير بقى ف ليلة العمر ولازم يضحك على عقل ليلى بكلمتين الواد عريس وعاوز يفرح بعروسته ثوانى او 11 دقيقه المهم يفرح
هههههههههههه فهمان ولا مو فهمان
saso
تصدق قطتي عيانة بجد طالعلها حاجات عجيبة كدة والعربية متنيلة بايظة ومش عارفة هاودية لدكتور ازاي دة فضيحة وبيخاف من كل حاجة :( ينفع تعالجة اونلاين علي البلوج
saso
اوكى اكتبى بس انتى الاعراض اللى ظاهرها عليها
والف سلامه على القطه الصغيره وربنا يحرس القطه الكبيره ههههههههه
عن جد مدونة مميزة وأنا سعيد بيك وتحياتي لك وسأمر على هذه المدونة دائما
ayhm jzzan
شكرا بجد على زوقك وتعليقاتك الجميله ويشرفنى مرورك بس ابقى خلى بالك من السلمه المكسوره
نورت المدونه بجد يا زعيم
و الله ضحكت ايه يا عم اللون ده احلي حاجة فيها البساطة كويس يا معلم
Mongey
تسلم على الكلام الجميل ويا ريت نتبادل الزيارات
حلوة يامفلس افندي
بس سمير ده مطيع قوي وبيعترف بالحق بسرعة
غريبة قوي الحكاية دي
مع ان اغلب السميرات بيغالطوا وبيفسروا اجزاء من الدين تناسب افكارهم المراد تطبيقها
واول ماحد يكلمهم يفتكروا حقوقهم التي شرعها الله لهم وعند واجباتهم يصابوا جميعا بالزهايمر
ههههههههههههههه
Bella
اصل سمير بتاعنا ده يبقى سميرا ميس
هههههههههههه
خلاص لو سمير عجبك شخصيته هاغير اسمى من دلوقتى ويبقى سى سمير
نورتى المدونه وماتحرمينش من زياراتك اوكى؟
اسلوبك جميل جدا في الكتابه ..بس اللي انت كتبه ده حلم
القطة الكبيرة بتقوللك ميرسي يا جميل
بص هو طلعلة حاجة غريبة في رقبتة قلت التهاب او اي حاجة هريتة مضاد حيوي اللي بيترش دة ولا الهوا!! وطلعتلة واحدة تانية جنبها وماما بتقول انة ورم معرفش لية،، طبعا هو بيتجنبني لانة لسة فاكر اني مجنونة من ساعة مازعقت بطلوا دوشة ومكانش في البيت غيري انا وهو !! مش موضوعنا فمش مخليني المسة
ملحوظة: القط دة نضيف لدرجة مستفزة مفيش اي احتمال يكون التهاب
Amira Hassan
نحلم يمكن حلمنا يتحقق ولو ماتحققش يبقىماخسرناش كتير
وعلى العموم سمير مادام دخل قفص الزوجيه هيبقى مطيع ل ليلى ماتخفيش مادام هى اللى معاها مصروف البيت كله هيبقى تمام
نورتى المدونه بتعليقك
saso
سورى لسه قارى التعليق دلوقتى بس
طيب هى القطه دى مخبوطه فى حاجه ؟
الوره ده احمر ملتهب؟
فى تجمع صديد؟
مش لازم علشان القطه نظيفه يبقى مافيش التهاب ممكن اساب تانيه وعلى العموم كملى جرعة المضاد الحيوى بس ابقى اوصفيلى الاتهاب دى باجابتك على الاسئله اللى كتبتها
مستنى الرد يا اجمل قطه فى المدونات
نونونونونو
yasser
ولا يهمك يا زعيم نغير اسمنا ونخليه سمير
ونبقى الشعب السمير ابو مسامير ههههههههه
نورت المدونه
لا ياعم سمير بتاعك بيرجع فى كلامة
دة عيل اوىىىىىىىىىى
وجاب لينا العارررررررر
ههههههههههههههههههه
تحياتى
gwad
لازم يسحب ناعم لحد ما الليله تمر فى هدوء
وهو ده لؤم سمير
هههههههههه
يا رب ياخوية يا رب !!!
t3ala enta b2a 3andena fil ahwa w negeblak 7alabessa
http://salamtrocafe.blogspot.com
ميرسي يا جميل
القطة ممكن تكون اتخبطت طبعا دة عبيط وبيخبط في الحيطة اوقات
بس الورم - دة لو ورم يعني مش ملتهب احمر ولا علية صديد
هو بس حفرة من غير شعر عليها،، ولونها احمر خفـيـيـيـف ومش مستحمل حد يقرب منها
وبديلة المضاد الحيوي لسة
سمير ده إللي بتحكي عنه, هو كان الراجل إللي كنت طول عمري بتمناه, وتحقق حلمي
كلامك جميل قوي, معرفش إزاي إنتو المصريين بتجيبوا الإبداع ده منين, دي نعمة من عند الله
تحياتي
السلام عليكم ورحمة الله وبركاته
الأخ العزيز مفلس ،، ابدي اعجابي الشديد واضم رأي لجميع الأصدقاء واسلوب راقي فعلا لتناول المشاكل والمعاضل ـ مصر بيك ـ هيا هيا مش ها تتغير وناسها واهلها ، علمتوني الشوق.
BaTaBeeT
نورتى يا زعيمه انا روحت عندك وقريت الموضوع هههه يخرب عقلك بجد ضحكت كتير منه طريقتك جميله وروحها حلوه قوى
saso
حفره من غير شعر دى لازملها دهان بقى من بره مرهم مضاد حيوى لو حتى تيراميسين وكملى المضاد الحيوى بتاعك
لو ماجبش المرهم نتيجه اجى لحد عندك واشوف القطه بقى ههههههه وكله ببلاش
لمياء الحالمة
انا مش عارف اشكرك ازاى بجد والله اسعدنى جداا وجودك ف المدونه وتعليقك الراقى الجميل ده
اتمنى نتبادل الزيارات
نورتى المدونه ونورت مصر كلها
يا مصر اكتب إليكي رسائلي
تسلم على الكلام الجميل ده وانا بعتبر كلامك وسام بجد من واحد متحضر صاحب فكر زيك
نورت المدونه وشرفتنى
تحياتي ولحد عندكم جي اقول
بمناسبة الشهر الكريم كل عام وانتم والأسرة الكريمة وكل الأصدقاء والأحباب بالخير ومصرنا الحبيبة كلها بالخير واليمن والبركات
يا مصر اكتب إليكي رسائلي
كل سنه وانت طيب يا باشا وكلك زوق
تحياتى
حلو اوى اوى اوى
كلام مظبوط
مع انى طبعا مقدرة موقف ليلى من الاول
لكن سمير كدة عداه العيب يابنات
ويريت تطلع الرجالة كلها زى سمير
الدنيا مولعه خلقه انت رميت بنزين تاني ليه
اهرب يا حلو شهروزه بتدور عليك
الوردة السودة
الحمد لله انه عجبك انا بجد سورى بتاخرف الرد رمضان وكده
كل سنه وانتى منورانى ديما
مـحـمـد مـفـيـد
هههههههههههههههه هاهرب هاهرب بس ابقى خلي بالك من العيال
سلالام
تقريبا انا عندي نسخه من سي سمير ده..لكن من سي سمير ده لا مؤاخذه!!!ا
يابختك ياعم سمير...
عقبالنا يارب :ي
وهو سمير تراجع ليه بسرعة كده
هى ليلى كانت معاها أكياس بلاستيك فى الجهاز و للا ايه ؟
بس ليلى عجبتنى وقفته عند حده بالأصول من اولها ما استنيتش بقى لما يبقى فيها ضرب و للا محاكم ... الستات دول
دمااغ ما شاء الله
و ربنا يجازى سمير خير ضحكنى
جميلة علي فكرة
بس صعب انك تلاقي ناسعاملة توازن و راجل واثق من نفسة و مش فاكر انه حرية سميرة او ليلي هي عدوان علي كبرياؤة
بس حاسة كأني بقرأ مقامة ...زي المقامة الحلوانية اللي اخدناها في العربي زمان
بس فن جميل :) و معاني حلوة
مع خالص تحياتي :)
مفلس أفندي خلاص
passساب الدنيا و
رايق بقى بصباص
تقولوا بلدنا خلاص
راجع يزجل ولا بلاص
المقامات المفلسه ....
لصاحب السعاده مفلس أفندي
هوه ده الكلام يا سمير
ههههه
حلوة
بس مش شايف انها خيالية شويتين ؟
يا راااااجل ...انت الصراحة دكتور قلب مش دكتور قطط.....انت بتخلي قلبنا يرفرف كدة سعادة من كلامك العسل الي بينزل على قلوبنا بلسم والله...انا بجد فخورة بيك يا مصري ...وفخورة اني تعرفت على انسان زيك ..ربنا يكرمك ....انت عسل بقشطة....يا لديد يا راااااااااااايق
استاذ مفلس انت فين كل الشهور دي
فين كتاباتك الجميلة
ياريت ترجع تكتب تاني
هايل يا بشمفلس
أنا استمتعت بالقصيدة جدا
أتمنى أزورك تاني
والله ليلى دى عجبتنى اوى اوى
وسمير كمان دماغه حلوة
يلا عيشه هنية
جميل اوى كلامك بس سمير اجمل ;)
الف الف الف مبروك لليلى وسمير وسمعنى سلام الصلح خير
وحشتنى مواضيعك الجااامده ياعم مفلس الرايق
بجد موضوعك ده طبعا بصرف النظر عن خفه الدم اللى فيه
هايل بجد
وفى النهايه سلامى وربنا يوفقك
ايوة بتريح الحزبين
بس ياريت فيه في الدنيا كتير من سمير اللي ممكن يراجع نفسه ويعترف بخطئه
للاسف سمير ده قليل جدا في الزمن ده
بس بجد كلامك جميل
Post a Comment
Subscribe to Post Comments [Atom]
<< Home